سەرۆکاتیا پەرلەمانێ کوردستانێ ل راگەهاندنەکێ دا کو ئیرۆ بەلاڤکریە ب توندی ئیدانەیا سەربرینا 50 کەچ و ژنێن ئێزدی دکەت کو ژلایێ تیرۆریستێن داعشێ ڤە ل باغۆزا وەلاتێ سوریایێ هاتبوونە سەربرین و داخوازێ ژ حکومەتا عیراقێ و حکومەتا هەرێما کوردستانێ دکەت کو رێکارێن یاسایی بگرنە بەر بۆ ئینانا تەرمێ وان 

ئيزيدي ٢٤ _ امين شمو 

ئیرۆ رۆژا ئێک شەمبوویێ 3 ئادارێ سەرۆکاتیا پەرلەمانێ کوردستانێ ل راگەهاندنەکێ دا ئاماژە ب وێ چەندێ دایە ، رۆژ ب رۆژ رێکخراوا داعش بەرەڤ لاوازبوون و نەمانێ ڤە دچیت و رۆژانە پەردێ لسەر چەندین تاوانێن کرێت یێن ڤێ رێکخراوا تیرۆریستی یێن دژی مرۆڤایەتیێ تێنە هەلدان ، دوماهیک تاوانا وانژی ئاشکرابوونا کوژتنا ژمارەکە کچ و ژنێن کوردێن ئێزدی بوو ل باغۆزا سوریایێ .

لگۆری سەرچاوێن لەشکەری و میدیایێ یێن برێتانیا داعشێ 50 کچ و ژنێن ئێزدی ب شێوەیەکی درندانە سەربرینە ، پەرلەمانێ کوردستانێ دبێژیت ئەڤ نوچەیە دیسا جارەکە دی تاوانێن تیرۆریستێن داعشێ ب بیرا مە دهینیت کو دژی کوردێن ئێزدی و هەموو ئایین و نەتەوە و پێکهاتێن جیاواز ئەنجام داین .

سەرۆکاتیا پەرلەمانێ کوردستانێ ئیدانەیا وێ تاوانا مەزنا تیرۆریستێن داعشێ دکەت و داخوازێ ژ لایەنێن پەیوەندیدار یێن حکومەتا عیراقێ و حکومەتا هەرێما کوردستانێ دکەت کو دیڤچونێ و رێکارێن یاسایی و پێتڤی بگرنە بەر بۆ ئینانا تەرمێن قوربانیان و ب دکیۆمێنتکرنا بەلگەنامێن ڤێ تاوانێ و هەموو تاوانێن دی یێن رێکخراوا تیرۆریستیا داعشێ ئەنجام داین و ب تاوانێن نێڤدەولەتی بهێنە بناڤکرن وەکو تاوانێن جینۆساید و تاوانێن دژی مرۆڤایەتیێ و تاوانێن جەنگی .