ئێزدی 24 _ كوجو

بالیۆزا نەتەوەیێن یەکگرتی بۆ نیازپاکیێ “نادیە موراد” بدەستڤەهێنەرا خەلاتا نۆبل یا ئاشتیێ ل سالا بووری گۆت کو حکومەتا عیراقێ و حکومەتا هەرێما کوردستانا عیراقێ و ل پاراستنا ئێزدیان دا ژ هێرشا داعش نە ژدلبوون و نەشیاینە ب شێوەیەکی باش بپارێزن .

“موراد” ل پەیڤا خوە دا یا کو ل رێ و رسمێن راکرنا گۆرێن بکۆم یێن ئێزدیان ل قەزا شنگال ل رۆژئاڤایێ نەینەوا ل باکوورێ عیراقێ گۆتی دا زانین کو ئەوا بسەرێ ئێزدیان هاتی جینۆسایدە و ئەو چەندە هاتە کرن ژ ئەنجامێ غەدر و کێمیا ل بەرامبەر ئێزدیان هاتی کرن ژلایێ دەوروبەرێت ئێزدیان ڤە.

“موراد” زێدەتر گۆت کو ئێزدی هەڤرکیا سیاسی یا ل ناڤبەرا حکومەتا عیراقێ و حکومەتا هەرێما کوردستانا عیراقێ لسەر دەڤەرا شنگال و دەڤەرێن دیێن ئێزدیا قەبول ناکن و داخوازکر کو ئەڤ هەڤرکی بێتە ڕاوەستاندن و یا باشتر ئەوە پشتەڤانیا وان بکن بۆ پشتڤانیکرنا ئێمناهیا ڤان دەڤەرا بۆ ساناهیکرنا ڤەگەریانا خەلکێ دەڤەرێ بۆ دەڤەرێ.

“موراد” داخواز ژ هەردوو حکومەتێن عیراقی و کوردی کر کو ئاریشەیێن جووتبوونا کارگێریێ ل قەزا شنگال چارەبکن و چارەیێن ب لەز بۆ ببینن و هەوا ئاڤەدانکرنێ دەستپێبکە بۆ ڤەگەریانا ئاوارەیێن ئێزدی بۆ دەڤەرێن خوە.

“نادیە موراد” ئاماژە ب وێ چەندێ کر کو ئێزدی بیروباوەرا”عفا الله عما سلف” رەتدکن و داخواز ژ هۆز و جیرانێن دەڤەرێن ئێزدیا کرکو ئەوێن پشکداری ل جینۆسایدکرنا ل همبەر ئێزدیان دا هاتیە ئەنجامدان بۆ گەهشتن ب حەقیێ بۆ قوربانیا و پشتی هنگێ دێ بەحسێ ل هەڤ هاتنێ کن.

هەروەسا “موراد” گۆت کو داعشا تیرورست ئێک دەرنەئێخستیە ژ تاونێن خوە و عیراقی هەموو ژ تاوانێن داعش نالاندن چ شیعە و چ مەسیحی و کاکایی و سنە و کورد لێ ئەوا ب سەرێ ئێزدیان هاتی یا یا جیاواز بوو و ئارمانج ژێ جینۆسایدکرنا وان بۆ.

‌‎دیسانێ “موراد” داخوازکر کو عیراق بهێتە ئیسلاح کرن ژ شنگال ژ بەر کو جینۆساید لێ هاتە کرن و ب هەزاران سڤیل بوونا قوربانی و گوتنا خوە ب رەحمەکرنا شەهیدێن مەیێن بێ گوننەهـ و ڤەگەریانا گرتیێن مە و سەرەخوشی و سەبرێ بۆ خەلکێ مە و خوەراگریا وان لبەرامبەر ڤان دەردەسەریان هەموو بدوماهیک ئانی .